Ex-OFW sa Lasam Cagayan, biktima ng scam sa Facebook

Isang dating OFW na tubong Lasam, Cagayan ang nabiktima ng isang scam sa Facebook. Ang biktima ay kinilalang si Elmer Alos, 52 anyos. Ayon sa kuwento ng biktima sa PNP Lasam, base sa ulat ng Bombo Radyo, isang private message umano ang natanggap niya mula sa kanyang pinsan na si Mirriam Visaya na nag-aalok ng trabaho sa Canada. Nang tinanong umano ng biktima kung papaano ang proseso, ang sagot umano sa kanya ay magpadala ng P60,000 sa isang Rafael Hernandez. Agad naman umanong nagpadala si Alos sa nasabing pangalan sa pamamagitan ng dalawang transaksiyon. Huli na umano nang mabasa niya ang post ng kapatid ni Mirriam na nagsasabing na-hack ang account ng huli. Agad din umanong tumawag ang biktima sa pinsan upang kumpirmahin ang insidente. Ayon sa ulat, nakuha umano ang halaga sa Pampanga. (sinulat ni DAVE CALPITO) Source: Bombo Radyo (http://www.bomboradyo.com/dating-ofw-naloko-ng-scam-sa-facebook-sa-cagayan/)